یئتگینلیک چاغی - بیرینجی بؤلوم

یئتگینلیک (1) چاغی
قونو = توپلومسال
بؤلوم : اؤیکوجوک
بیرنجی بؤلوم

گئنه ده بو گئجه یئک (2) گؤزل بیر قیز دونوندا (3) یوخوسونا سئزمیشدی (4). سویوخ قیشین اورتا آیینین ایلک (5) گونلریندن بئله نجی یوخولار باشلانمیشدی. بیر ساری دونلو قیز و دونیادا گؤیچکلیکده اونا تای اولماز؛ نئچه کره (6) یوخوسونا گلیردی اوره یی یئریندن چیخیردی. سئویشیردیلر و بیر آزدان سونرا بدنینین تیتره مه سینه گؤره یوخودان قالخییب دوشونوردو کی گئینه ده آلدانیبدیر و اؤزونو باتیریبدیر. بو ایشه لاپ چاشمیشدی! نه اولاجاغی دوزگون آنلامیردی. یئتگینلییه گؤره آزدان چوخدان ائشیتمیشدی آنجاق هله 14 یاشی اولمامیشایدی! نئجه اولار بیر اوغلان 15 یاش اولمادان یئتگینله شه!؟
****
احمد ایسه نئچه یاشداشلاری (7) کوچه باشیندا ییغیشمیشدیلار. نئچه واختیدیر دانیشیق بیچیمی (8) دگیشمیشدی. دانیشاندا قالین و اینجه سسلر بیریبیرینله پیرتلاشیردی (9) و سسی جورولدویوردو (گورولدویوردو) (10). اوشاقلاردا اونا گولوردولر و ایستهییردیلر سادهجه احمد دانیشسین. احمدده، سس یوخ! چوخ شیئلر دگیشیردی. ساریمتیل بیغلار (11) گؤیه رمه یه باشلامیشدیلار. سینه سی گئنیشله نیردی و دوز اورتاسیندا نئچه دنه توک گؤیه ریردی. اوره یینین تاپپیلتیسی گوجله نمیشدی. ایچینده نئچه قات آرتیریلمیش گوجون یییه سی اولموشدو. اوشاقلارا زور دییردی و اونلارلا آتیشیردی. اوشاقلاری اؤز باشینا ییغیردی و گونده تربیه سیز اؤیکولر و یالان یوخسا گئرچک قیز اوغلان ماجرالاریندان دانیشیردی. یوخودا گؤردویو قیزدان، قونوشلاردا اولان قیزلاردان و اونلاری گیزلیندن گؤز آستینا آلماغیندان، بوش کوچه لرده نئچه قیزی قوجاقلاییب قاچماسیندان و باشقا باشقا دانیشماقلاری هامیا خوش گلیردی. هله بؤیوک قارداشینیدا اوچ خیابان آشاغیدا بیر قیزینان گؤرموشدو کی چالیشیرمیش قیزا بیر کاغاذ وئرسین و قیز اونو جیریب آتمیشدی یئره! هر گون سؤزو واریدی دانیشماغا و بو گونده اوغلانلاری باشینا ییغیب و یئنی بیر اولایی تعریف ائتمه یه حاضیرلانیردی.
آردی وار ....
*****
سؤزلوکجوک :
1- یئتگینلیک = بلوغ
2- یئک Yek = شیطان
3- دون Don= جلد لیباس گئییم
4- سئزمک = نفوذ ائتمک
5- ایلک lk= اول ابتدا نخست
6- کره Kərə = دفعه
7- یاشداش = همسن و سال
8- بیچیم = فرم شکل محتوی
9- پیرتلاشیریدی Pırtlaşdı = پیرتلاشماق = بیریبیرینله ایلیشمه ک در هم تنیدن
10- جورولده مک Cürüldəmək = کنایه دو رگه شدن صدا (بوردا)
11- بیغ Bığ = سبیل آزربایجانین بعض بؤلگه لرینده "بوغ" دا دئییلیر.

ایکینجی بؤلوم: http://www.miyanali.com/taymaz-ocaqlu/9