فراموش کردم
اعضای انجمن(187) ارتباط با مدیریت انجمن طریقه آپلود عکس ، فیلم وموسیقی میانالی از نگاهی متفاوت طریقه قرار دادن موسیقی و کلیپ در مطلب
جستجوی انجمن
مدیر انجمن: جلال علی اصغری
ائلی * (tarsun )    

بایراملیق پالتار - داستان

درج شده در تاریخ ۹۴/۰۵/۲۸ ساعت 14:51 بازدید کل: 379 بازدید امروز: 1
 

یاشلی کیشی، بیر پالتار توکانینین ویترینینه خئیلک باخاندان سونرا، ایره‌­لی­‌ده­‌کی اوینایان اوشاق­لارین لاپ آریغینا اوز توتاراق، سسله‌­ندی: "جیققیلی­... منه بیراز یاردیم ائده­‌بیلرسن؟" اوشاق، هفته سون­‌لاریندا اوینادیقلاری شار اویونوندا ایلک دؤنه اوتدوغونو سایمایاراق یولداش­لارینی اؤتوروپ گلدی. یئددی سککیز یاش­لاریندایدی، اه‌­ینینده­‌کی پالتارلار، دئمک اولار داغیلمیشدی. یاشلی آدام، اوشاغین ساچ­‌لاری‌نی سیغاللادیقدان سونرا "ویترین­ده‌­کی پالتارلاری دئمیشم گئیه­‌سن، گئدک گؤرک اه­‌ینیوه اولاجاق؟" دئدی.

اوشاق، ایلک اؤنجه بو اؤنه‌­ری­نی شوخلوق ساندی. آمما کیشی سون درجه جیددی‌­یدی . اوننان بیرگه توکانا گیرنده، اؤنجه رویادا اولوپ اولمادیغینی دوشوندو. گئنللیک­له ائولیک­‌ده­‌کی1 بؤیوک اوشاغا آلینان یا قونشولار وئرن گئیه‌­جک‌­لر، اونا دار گلمه‌­سی­ اوچون اورتانجا قارداشینا قالار، نئچه ایل سونرا دا دیزلری آشینمیش2 یا دلینمیش دوروم­دا اؤزونه وئریلردی.

آنجاق هر زامان مریض دئدیکلری آتاسی­نین نه قدر چتین پول قازاندیغینی بیلدیگینه گؤره، بیر سئری بئله دیلله­‌نمه­‌میشدی. ایندی­‌یسه، ایلک دؤنه یئنی بیر پالتاری اولاجاغیدی. اوسته‌­لیک بایراما دا اوچ گون قالان...

اوشاق، یاشلی کیشی‌­نین گؤرستدیگی پالتارلاری گئیرکن، بؤیودویونو ایلک دؤنه آنلادی. مخمل­‌دن تیکیلمیش جیزیقلی شالوار، قیچ‌­لاری‌­نین نه قدر اوزون اولدوغونو اوزه چیخاردارکن، یئنی ژاکتی ده چییین­لرینی آیدین­جا گئنیش گؤرستمیشدی. آمما هامی‌­سی‌­نین اوزه‌­ریندن گئیدیگی پالتوو، آیری بیر شئی ایدی. دای اوشومه‌­یه‌­جه‌­یدی.

اوشاق بیراز اؤنجه اوتدوغو شارلاری اونون جیبینه قویاندا، بتر کئف ائله­‌دی. خیردالی ایری­لی شارلار، چوخ درین اولان جیب‌­لرین بیر بیجاغیندا قالمیشدی. دئمک اولار هر جیب‌­ده، ان آزی، اللی شار یئرله­شه­‌بیلردی. یاشلی کیشی اوشاغی ساغا سولا دؤندردیکدن سونرا پالتارلارین قوتویا قویوپ باغلاماسینی ایسته­‌دی. سونوندا، ساتیجی­‌یا "پالتارلاری نوه‌­مه آلیرام." دئدی. " اونو چاشدیرماق اوچون، اونلاری بو اوشاغین اه‌­ینینده سینادیم." ایکی­‌سی‌­نین ده سایزی، بویو زات بنزردیر...

اوشاغین بئینی تاققیلدادی، نه دئیه‌­جه‌­یینی بیلمه‌­دی. آنجاق دای بؤیودویونه گؤره ، بیر شئی بللی ائتمه­‌مه‌­لی­یدی. آینایا سون دفه باخاندان سونرا، اه‌­ینینده‌­کی‌­لری یاواش یاواش چیخاردیپ، بیر قیراغا توللادیغی اسکیمیش­‌لری گئیدی.

کیشی، پالتارلارین نوه‌­سینه اویاجاغینا آرخایین ایدی. اوشاغا زحمت چکدیگی اوچون بیر ساققیز پولو وئرمک ایسته­‌ینده اونو یانیندا گؤره‌­بیلمه­‌دی. بللی دیر، شیلتاق اوشاق، بو ایش‌­دن سیخیلمیشدی.

اوشاق یولداش­‌لارینین یانینا قاییداندان سونرا بیر قیراق­‌دا اوتوروپ اونلارا باخیردی. یولداش­‌لاری نه قدر اونلارا قوشولماق اوچون دیره‌­ندیلر، گنه اونلارا قوشولمادی.  یولداش­‌لاری: "نه­‌یه گؤره اوینامیرسان؟" دئیه سوروشدولار. " ان گؤزل شارلاری سن اوتوپسان."

اوشاق گؤزلریندن اینجی کیمی سوزولن یاش­لاری یولداش‌­لاریندان گیزله‌­تمه‌­یه چالیشارکن: "شارلاریم، بو پالتارلارا یاراشمایاجاق قدر گؤزل­ ایدی." دئدی. "بو اوزدن اونلاری، بایراملیق پالتووومون جیبینده ساخلادیم!"

1. ائولیک: عاییله
2. آشینماق: سورتوله سورتوله آرادان گئتمک


یازار: cüneyd suavi
چئویریجی: حسین ساعدی
بو اؤیکو بایرام درگی‌سی‌نین 54ونجو سایی‌سیندا چاپ اولوبدور.

این مطلب توسط جلال علی اصغری بررسی شده است. تاریخ تایید: ۹۴/۰۵/۲۹ - ۱۱:۲۷
اشتراک گذاری: تلگرام فیسبوک تویتر
برچسب ها:

1
1


لوگین شوید تا بتوانید نظر درج کنید. اگر ثبت نام نکرده اید. ثبت نام کنید تا بتوانید لوگین شوید و علاوه بر آن شما نیز بتوانید مطالب خودتان را در سایت قرار دهید.
فراموش کردم
تبلیغات