فراموش کردم
اعضای انجمن(461) ارتباط با مدیریت انجمن طریقه آپلود عکس ، فیلم وموسیقی میانالی از نگاهی متفاوت طریقه قرار دادن موسیقی و کلیپ در مطلب
جستجوی انجمن
محمدرضا مختاری (mr-muxtari )    

قوناق اتاقی

درج شده در تاریخ ۹۱/۰۵/۱۱ ساعت 19:44 بازدید کل: 550 بازدید امروز: 43
 

بو یازی نی عزیز میانالیلارا تقدیم ائلییرم.

                                                         قوناق اتاقی

بیلمیرم سیزین ائوده ده بئله بیر مسئله اولوب یا یوخ؟ آمما بیزیم ائوده اتاقلارین آدی وار!حیاط قاپی سین آچیب ایچری تشریف گتیرسیز سول طرف ده گؤزونوز بیر ایکی باغچا گؤره جک اون، اون بئش متر یوخاری گلسن بالکونا چاتاندا ایکی قاپی وار،بؤیوک قاپی هال اتاقینا آچیلیر. سولدا کی قاپی نی سونرا بیله جکسیز!هال دا بئش قاپی وار،ساغدان بیرینجی سویوق اطاق دی،آشپزخانا،(اوزونوزه گلاب) سرویس،دیب اطاقی و آخیردا سول الده بیرینجی اولان قوناق اتاقی.دئمه لی سویوق اتاق سرین اولارو یای دا ایشله نیر،دیب اطاق قیش مالی دیر.آمما قوناق اتاقی باغلی اولار.همان بالکن دا دئدیگیم سولداکی قاپی ائله باخ بو قوناق اتاغینا آچیلیر کی قوناقلار ائوین ایچیندن کئچیب قوناق اتاغینا گیرنده بی آبری اولمایاق!
قوناقین حؤرمتینه منیم آتام آیری بیر قاپی آسیب،آخی منیم آتام معماردی. لاپ دا یاخچی معمارلاردان.شاه زامانی ایرانین هر طرفینده غربت چکیب کؤرپو تونل ایشله ییب،انقلابدان سونرا بیر جار قاب قاشیق ساتسادا یئنه اؤز ایشینه قاییدیب و آقکند،آرموداق،له له لی، کوبلان و...ده مدرسه تیکدی.بونلارین بعضینده منده فعله لیک ائله میشم. دییه سن موضوع دان قیراغا چیخدیم!نه ائییله یم منده سوزون کیمی مییانالییام وآزدا اولسا آتامی گره ک تعریف ائیله یم،قولتوغوما قارپیز وئرم!
مختصر،باخ بو قوناق اتاقی اوشاقلیقدا بیزیم اوچون باغلی اولاردی.آتام اورا بیر جوت الده توخوما یون ساپدان حاضیرلانمیش هریس فرشی آلمیشدی.من هله ده او فرشلرین گؤزللیگیندن دویمامیشام.اتاقین تاقچاسین سربخاری آدلانان بیر زاد بزه میشدی.ائوین لاپ یئکه اتاقی دیوارلاری کاغذدان گؤزل بزنمیشدی،آرا سئرا قوناق گلنده بیزده گیریب اتاقدا اوتوراردیق.بو اتاق نوروز بایرامی،خیرشر واقتی،باجی قارداش تویوندا،آتا آنامی مکه یه یولا سالاندا و ...استفاده اولونوردو. قوناق گلنده بیزده آذربایجانلی کیمی اونلارا ائوین لاپ یاخچی دوگوسون،میوه سین،چایین،استکانین،قاب قاشیقین ایشله دردیک.آمما سیزده دئییم کی آنا مهربان اولار خصوصأ میانالی آنالار،اولماز کی آتامی تعریف ائله ییم آمما آنامی تعریف ائله مییم!مشق یازاندا،درسه باخاندا بو اطاقدان استفاده یه اجازه وئرردی.منده خطاط لیق مشق ائلیینده نئچه دفعه داواتی داغیدیب همان هریس فرشلرین یامان گونه قویدوم!
سویوق اتاق لاپ کاسیب اتاق ایدی.آنجاق یایدا سرین اولوردی. اوچ طرفی(بیر طرفی بالکونا،بیر طرفی خیابانا، بیر طرف ده اوست مرتبه نین پلکانی)آچیق اولان اتاقی میانانین شاختا سیندا قیزدیرماق فلکین ده ایشی دئییل. دیب اتاق پیس دئییل دی یایدا ایستی اولاردی آمما قیشدا یامان یئر ایدی،سویوق نه دی بیلمزدیک.کرسی نی ده  قوراردیق.کئف ایدی بیزیم اوشاقلیقیمیز!
بئله اولدو کی بیز بیر بئله قوناق اتاقیندا ایلین جمعی سی ییرمی ییرمی بئش گون استفاده اولاردی لاپ بؤیوک گؤزل امکانلی یئر اوچ یوز قیرخ گون استفاده سیز قالاردی!
جانیم سیزه دئییم کی قوناق گلنده یالاندان دئییریک شوربانین سویون چوخالداریق! الیمیزدن گلنی پیشیریب قوناغا یئدیزدیریریق،مابادا قوناق بیزدن ناراضی قالار!قوناقی سئویندیمک بیر طرفی اولسا تظاهر و ریا او بیری طرفی دیر.  ائوین واقعی وضعیتین یوخ،قوناق اتاقیندا یاشادیغیمیز شرایطی دفعه لرله آرتیق گؤستریریک.</p>
ایندی ده اوپن اولان ائولر هله قوناق اتاقین ساخلایبلار.هئچ اولماسا یاخچی مبلیمیزی امکاناتی، قوناقا گؤسترمک اوچون ساخلایب اؤزوموز یئرده اوتوروروق! باخاندا گؤرورم کی هامی اؤزونو بئله گؤستریر! جماعاتین گؤزونون قاباغینا قویدوغوموز شخصیت باخ ائله قوناق اطاقی دی.واقعییت دئییل! باغیشلا عزیز اوخویان من اؤزومو دئییرم  البته کی سیزده تظاهر و ریا اولا بیلمز.ملتین باشینا بؤرک قویوب قوناقی، قوناق اتاغیندا یئر وئرن،خدمت اوچون یوخ، پوز وئرمک اوچون،ائله حیاتدا دا ظاهرینی قوناق اطاقی کیمی بزه مه لیدیر!حیاتین چوخ ده یرلی واقتین ائله بو بزه مکده و اونون خرجین تاپماقدا کئچیردیریک.
ایندی اورکده اولانیم اوزومده گؤرسنیر،باغیشلا منی عزیزیم اگر ناراحات اولوبسان.آمما حقیقت آجی دیر.  بیر آز طنزین شیرینلیقی بو یازیدا اولماسایدی بلکه هئچ سایتا دا قویولمازدی! چوق دای اوستون آچمیرام اؤزون عاریف سن بیلرین نه ایستیرم سنه دئییم؟  قورخورام بیردن بیر عده نین آجیغینا گلسه منی قیشدا سالالار سویوق اتاقا! نئجه دی ائولردن بو قوناق باجی اویونون یئغیشدیراق بلکه اوشاقلاریمیز آنلاسین کی قوناق دا گلنده ائله بیزیم باجیمیز، قارداشیمیز، داییمیز، عمه میزدی.ائله بیزیم حقیقی شرایطی گؤرمه لی دیر نه بزنمیش قوناق اطاقین. یئدیگیمیز شوربانین سویون آرتیراق! اوندا قوناقدا اؤزون بیزدن بیلر،بیزده راحات اولاریق اودا.نئجه کی واریق ائله گؤرونمکدن خجالت چکمیک.
<p>گلین متظاهر آداملارین یئر اوزونده  آزالماسی  باخ ائله بیزیم بو میانادان باشلاسین!آخی اورکده اولمایان صفت لری اوزده گزدیرمکدن من بیر نفر بئزمیشم. بوندان سونرا منیم اوره ک ائویمه قوناق  گلن دوستلار بیلین کی قوناق اتاقی یوخدو! یای دا سویوق اطاق، قیشدا دیب اتاق!  ساغ اولون
محمدرضا مختاری

باکی یای ۱۳۹۱

تاریخ آخرین ویرایش مطلب: تاریخ آخرین ویرایش: ۹۱/۰۵/۱۱ - ۲۳:۱۲
اشتراک گذاری: تلگرام فیسبوک تویتر
برچسب ها:

1
1


لوگین شوید تا بتوانید نظر درج کنید. اگر ثبت نام نکرده اید. ثبت نام کنید تا بتوانید لوگین شوید و علاوه بر آن شما نیز بتوانید مطالب خودتان را در سایت قرار دهید.
فراموش کردم
تبلیغات
کاربران آنلاین (1)