بی اعتنایی «مهدی عزیزی» به قوانین سایت مییانالی !! (تورکجه یازمیشام، باشارامایانلار اوخوماسین)

«مهدی عزیزی» و سیته یاسالارینا اعتیناسیز باخیشلاری !

قانونا حؤرمت ساخلاماق و اونا عمل ائتمک هامیمیزین بوینوندا آغیر وظیفه دیر. بوتون مییانالی سیته سینین ایستیفاده چی لری بو سیته نین قانونلارین قبول ائده رک عضو اولوبلار. حتی «مهدی عزیزی» اؤزوده سیته نین بیر عضوو اولاراق بوتون قانون لارا باش ایمه لی دیر. منجه آغای عزیزی بعضی قانون لاری دوزگون ایجرا ائتمیر بعضی لرینه ده تبعیض له یاناشیر!

دفعه لرله، بیر عضوون کامئنتینده تکجه بیر ایستیفاده چی یه سویوش یازیلماقلا اکانینین مسدود اولماسینا شاهید اولموشوق! آنجاق «حسین باصفا»! آدلی ایستیفاده چی یازدیقلاری مطلبده و اورادا یازدیقلاری نظرلرینده بوتون میللییت لره توخونوب (http://asman-asman.miyanali.com/14) و «اوستاد مختاری» اؤز کامئنتلرینده میلیونلار اینسانا توهین اولماسین بیلدیریب. بیر عضو باشقا بیر عضوو حیوان آدلاندیریرسا مسدود ائدیرسیز آنجاق «حسین باصفا» (آغای مختاری نین یازدیغی نظری اساس توتاراق) میلیونلار اینسانا توهین ائدرکن مسدود اولمور. او مطلبین یازاری اؤزون قانوندان اوستون بیلیب و قانونو اؤز ایسته ییله تفسیر ائده رک دیلدن و طبیعی حاقلاریمیز و ایسته کلریمیزدن ال چکمه یی اؤلکه مصلحتی بیلدیریب! بیلمیرم «حسین باصفا» هانسی مقامدادیرلار و هانسی فاکتورلارلا اؤلکه نین مصلحتین تشخیص وئریرلر!

سیز دیلیمیزدن و طبیعی حاقلاریمیزدان ال چکمه یی مصلحت! بیلیرسینیزسه من او حاقلارین آلینماسینی مصلحت گؤره رک اؤزومه شرف سانیرام. اؤلکه مصلحتی آنایاسانین ایجرا اولماسی دیر یوخسا اولماماسی؟! مصلحت، بوتون میللیت لرین تام حاقلارین وئرمکده دیر یوخسا اونلارین آراسیندا تبعیض یارالدماقدادیر؟!

«حسین باصفا» کیمی لر اؤز فیکیرلرینجه اؤلکه مصلحتینه گؤره دیل لرین، ایسته کلرین و ناموسلارین ساتیرسالار من تام ترسینه  دیلیمی ناموسوم بیلیب اؤلکه مصلحتینه گؤره قورویوب و موحافیظت ائدیرم. سیز فقط فارسجا یازماغی اؤلکه یه مصلحت بیلیرسیزسه من آنادیلیمده یازماغی مصلحت گؤرورم.

منجه «حسین باصفا» یازدیغی مطلبین آنلامین (مفهومون) باشا دوشمه یه رک سیته یه بوراخیب و مودورلر او ایهانتلی مطلبی سیلمک یئرینه بحثه باشلاییبلار.

عزیز دوستوم آغای عزیزی، توهین تکجه بیرینه سویوش یازماق یوخ دموکراتیک ایستکلره سایقی سیز یاناشماق ان بؤیوک ایهانتلردن دیر. سیز یازدیغینیز قانون لارا سایقی گؤسترمه سز باشقالاریندان آرتیق بیر شئی اومماق اولماز...!

آغای عزیزی و اوستاد مختاری نین مییانایا و آذربایجانا چکدیگی دانیلماز زحمتلری، گور آلقیشا لاییق اولاراق بو و بوکیمی یازی لار اونلارین چکدیگی زحمتلرین دَیرین اسکیک لندیرمیر.