فراموش کردم
اعضای انجمن(527) صفحه اصلی اخبار میانه عکس مذهبی هـنـری ورزشی حـــوادث کتاب میانه میانا تی وی معرفی همشهریان نمایندگان محترم مجلس مباحث انتخاباتی میانه اخبار ادارات و سازمانها درباره میانه بهمراه جزئیات لینکستان میانه مقررات انجمنهای صفحه اصلی
جستجوی انجمن
مدیر انجمن: مهدی عزیزی
بهزاد زالی (BehzadElyar )    

سئچکی لرده طایفاچیلیق

منبع : قافلان هفته نامه سی - بهزاد
درج شده در تاریخ ۹۴/۱۲/۰۴ ساعت 14:55 بازدید کل: 52 بازدید امروز: 50
 

هئچ بیر شوبهه اولمادان هر جامعه نین پیشرفت شاخصه لریندن بیری او جامعه نین سیاسی مشارکتی ایله اؤلچولور.حتی بعضی ضیالی‏لار و نظر صاحیب‏لری سیاسی مشارکتی اولمایان خالقلاری گئری قالمیش جامعه لر سیراسیندا یئرلشدیریرلر.

سئچکی لره قاتیلماق، خالقین ان آیدین سیاسی مشارکت سیمگه سی‏دیر [سیمگه = سمبل] آنجاق بو مشارکت‏لرین ده مثبت و منفی یؤنو[=طرفی] وار.

عمومیتله خالقین نقشی اولان و اؤز حقوق‏لاریندان آگاه اولان جامعه لرده سئچکی‏لرین نتیجه سی ده عموم خالقین و میللتین نفعینه قورتاراجاق. آنجاق ائل-طایفاچیلیق اساسیندا قورولان، هابئله اؤزلریندن ایراده لری اولمایان و سیاسی جهت‏لرینی بیلمه ین بیر جامعه نین سئچکی‏لری، نتیجه ده نئچه قات ثمرسیز بیر مشارکت اولاجاق. بو همن مشارکتین منفی یؤنودور.

بو نوع مشارکت تام قایداسیز و بیر بیلگیسیزلیک اساسیندادیر. اونون اوچون ده جامعه نین مشکل‏لرینی حل ائتمکده یئترسیز بیر مشارکت اولاجاق.

بیلدییینیز کیمی بوگونکو شراییطده شهریمیزین سیاسی، اقتصادی، اجتماعی و فرهنگی گلیشمه یه[=پشرفته] اساسی احتیاجی وار. آنجاق بو ساحه لرده پیشرفت اوچون اولان مانع لر خصوصا کیچیک شهرلرده سئچکی لرده قبیله چیلیک و طایفاچیلیق ایله اؤزونو گؤستریر.

بلکه جامعه ده اولان بیر سیرا محرومیت‏لره و یا باشقا سبب‏لره گؤره همشهری لریمیزین بعضی لرینده محله چیلیک، قبیله چیلیک و طایفاچیلیق حیسی گوجله نیر آنجاق بو باغلیلیق‏لار «شایسته سالاری»یه بؤیوک مانع ساییلیر. دئمک سئچکی‏لرده طایفا و قبیله تعصوبونو ساخلاماق سالیم بیر مشاریکته قارشی‏دیر.

شوبهه سیز بو وضعیت تمدونلو و مودئرن دونیا ایله تناقض‏دادیر. طایفا اوستونلویو و قوهوم-تانیشلیق تعصوبونو ساخلاماق ساده جه سئچکی لرده دئییل اداری عزل و نصب‏لرده ایسه اؤزونو گؤسترمکده‏دیر. قطعا بو نوع طایفاچیلیق دوشونجه سی ایله رأی صاندیق‏لارینا ساری گئتسک باشاریقلی و شایسته کاندیدالارین سئچیلمه سینه مانع اولوب و نهایتده خلاق و آیدین دوشونجه لی نماینده لرین ایش اوسته گلمه سینه یول وئرمه یه جه ییک!

طایفاچیلیق، باشاریشیغی و شایسته لییی نظرده آلمادان اؤز قوهوم‏لاریمیزدان بیرینی موختلیف منصب‏لره قویماق دئمک‏دیر.

عمومیتله همشهری‏لریمیز، فیلان نماینده نین دخالتی ایله شهرده اولان شایسته و نخبه اینسان‏لارا اهمیت وئریلمه دن نماینده نین اؤز طایفا-تانیش‏لاریندان شهرین موختلیف سمت‏لرینه منصوب اولدوقلارینی گؤرورلر. بو باخیشدان سئچکی‏لرده اصلح کاندیدانی تانیماغیمیزا باخمایاراق بیزیمله طایفا باغلیلیغی اولمادیغی اوچون اونو سئچمیریک!

اؤته یاندان [=دیگر طرفدن] طایفالارینین یاردیمی ایله چیخمیش نماینده لر، بیرسیرا باغلی اولدوقلاری گوج قایناق‏لاریندان فایدالانیب اؤز ائل-طایفا عضولرینین الیندن توتوب موختلیف گوج و ایش اورگان‏لارینا داخیل اولماقلارینی دستکله ییرلر. بو دینی و «شایسته سالاری» ده‏یرلردن قیراغا چیخماق دئمک‏دیر. بو مسئله جامعه میزی باتلاغا ساری یؤنه لده رک اونون باشقا منفی تأثیرلری ده ایللر بویو شهریمیزین اوستوندن چکیلمه یه جک.

بئله گئدیشله بو ناهنجار دوشونجه، ساوادلی شخص‏لره ده سرایت ائتمک‏ده دیر. بو تیپ شخص‏لر ده اؤز نفع‏لرینه گؤره، شغل یا مقام الده ائتمک اوچون اؤز طایفالاریندان اولان کاندیدایا رأی وئریرلر. بو مسئله سئچکی‏لرده طایفاچیلیق دوشونجه سینی گوجله ندیریر.

طایفاچیلیغی اوستون توتماق هئچ بیر دینی، علمی و انسانی معیارلارا اویمور و نخبه لر حاققیندا بؤیوک ظلم اولاراق شهرین و اؤلکه نین گئری قالماسینا سبب اولاجاق.

البت بو یازیدان هدفیم بو نامناسب پدیده دن چیخیش یولو گؤسترمک دئییل. ترسینه بو یازی طریقی ایله همشهری‏لریمیز آراسیندا عمومی بیر ایسته یی یایماق ایسته ییرم. بلکه بو یول ایله شهریمیزین آغ ساققال‏لارینی و نظر صاحیب‏لرینی چالیشه چکیب اونلارین نظرلریندن و فیکیرلریندن بو معزله چیخیش یولو تاپماق اوچون فایدالاناق.

مییانامیزین گلیشمه یه گوجلو پوتانسییئلی وار. شهریمیز ترانزیت مسیرینده یئرلشمه سینه گؤره هابئله مساعد هاوا و زنگین طبیعی ذخایر و جاذبه لرینه گؤره محروم منطقه دئییل. اونا گؤره گوجلو مودیریتله بو شهری بوتون آخساقلیقلاردان قورتارماق مومکوندور.

بیزیم دینی اینانجلاریمیزا گؤره ده ان اصلح نماینده نین سئچمه یی بیزه شرعی وظیفه ساییلیر. بو مسئله نین حل یولونون بیر بؤلومو ده شهریمیزین روحانی لری ودینی سؤزچولرین دانیشیق‏لاریندان و یول گؤسترمه لریندن کئچیر.

اومورام بو حاقدا دا عزیز و دوشونجه لی همشهری‏لریمیز اؤز ده‏یرلی باخیشلارینی، فیکیرلرینی، انتقاد و پیشنهادلارینی بیزدن اسیرگه مه سین‏لر.

این مطلب توسط مهدی عزیزی بررسی شده است. تاریخ تایید: ۹۴/۱۲/۰۴ - ۱۵:۰۲
اشتراک گذاری: تلگرام فیسبوک تویتر
برچسب ها:

1
1


لوگین شوید تا بتوانید نظر درج کنید. اگر ثبت نام نکرده اید. ثبت نام کنید تا بتوانید لوگین شوید و علاوه بر آن شما نیز بتوانید مطالب خودتان را در سایت قرار دهید.
فراموش کردم
تبلیغات
کاربران آنلاین (2)