تانریم ندن من؟
چئویرن: حسین واحدی

آرتور اَش، ویمبلدون تئنیسینین افسانهوی قهرمانی، 1983جو ایلده، بیر جراحلیق عملینده، بولاشیق قانا خاطیر ایدز توتوب اؤلوم یاتاغینا دوشدو. او، دونیانین باشا باشیندان، یانداشلاریندان مکتوب آلدی. یانداشلارینین بیری یازمیشدی: «ندن تانری بئله آجی مریضلیک اوچون سنی سئچدی؟»
آرتور جاوابیندا بئله یازدی: دونیادا 50 میلیون اوشاق تئنیس اویونونا باشلاییرلار. 5 میلیون نفر تئنیسین نئجه اویناماسینی اؤیرهنیرلر. 500 مین نفر تئنیسی پئشهکارلیق سویهسینده اؤیرهنیر. 50 مین نفر مسابقهلره قاتیلیر. 5 مین نفر آدلیم اولورلار. 50 نفر ویمبلدون یاریشلارینا یول تاپا بیلیر. اونلارین ایچیندن 4 نفر، یاریمفینالا چاتیر. 2 نفر ایسه فینالا ...، و قهرمانلیق کاپینی الیمده توتدوغوم آن، هئچواخت دئمدیم: «تانریم ندن من؟» و ایندیده بو مریضلیکدن آجی چکدیگیمده ایسه، «تانریم ندن من؟» دئمیرم.
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
سؤزلوک:
بولاشیق: آلوده
یانداشلاریندان: طرفدارلاریندان
پئشه کار: حرفه ای
آدلیم: مشهور
اؤیرنیر: تعلیم گؤرور
ایسه: نیز