فراموش کردم
لطفا تایپ کنید...
رتبه کلی: 10526


درباره من
احمد اسماعیلی (AHMAD177 )    

قیسسا داستان :کوبلان کندی (ع- سلامی)

درج شده در تاریخ ۹۵/۱۲/۲۱ ساعت 07:48 بازدید کل: 52 بازدید امروز: 52
 


کوبلان کندی
آنامین منه سویله دیگی ناغیلارین ایچینده قورخولو اولمایان هئچ یوخدو.

یئنیجه دوغموش قادینلارین جیارینی قوپاریب بولاق سولاریندا یودوقدان سونرا ییه ن" آلیبانی" لار ،"قولئیبانی" لار
گئجه نین قارانلیغی وسسیزلیگی ایجینده کندین یاخینلیغینداکی تپه نین آردیندا چالیپ اوخویان وشنلیک قوران"جین" لر وبوکیمیقورخولوو گورونمز وارلیقلار،آنامین اورمانلارینین قورخولو و سیررلی ساکینلریدیلر.

آنام اوناغیل لاری، او قدر ایناملا،او قدر ئورکدن وایچدن سویله یردی کی،بوتون اونلاری ئوزگوزلریله گوردویونه ایناناردیم. 
آنام دانیشارکن،سینما پرده سی کیمی اوزونده جانلانیب گوزلریمین ئونیندن کئچه ردی.


بیر گئجه آنام بیر جین ناغیلی سویلییه رکن او جینی اونون اوزونده گوروب دهشئتدن آنامین اوزوندن قاچیب قوجاغیناسیخیندیم.او: "بالا،ندن قورخورسان،ناغیلدیر دای!"دییب باشیمی سییغاللادی.

اوزون ایللردن سونرابئله،دونیامیزین اینسان ایشیقلاریندان بوشالمیش قارانلیقلاری منیم اوچون آنامین قورخولو
گورونمزجین لرینین شنلیک قوروب چالیب اوینادیقلاری و اوخودوقلاری یئرایدی.

آنامین بوتون ناغیلاری ایجینده قورخولو اولمایان بیرناغیل واریدی .اوناغیل کوبلان ناغلی ایدی.اوناغیل اصلینده ناغیل
دییل،آنامین بیرنئچه دفه اولدوغو کوبلان کندیندن سوزلرییدی.آنامین او سوزلری شیرین بیر ناغیل کیمی قولاقلاریمدا
سسله نه ردی. 
ناغیل بیلدیگیم بو سوزلر یوخوما آچیلان ان گوزل بیرقاپییدی.بو قاپینین اردیندانه قارانلیقلاری دولدوران قورخولو
جین لرواردی ونه ده یئنیجه دوغموش قادینلارین جییرینی قوپاریب ییه ن آلئیبانی لار ،قولئیبانی لار.
او قاپینین آردیندان قایالاری یارا-یارا، قیوریلا-قیوریلا گئدن بیر جیغیر آچیلیردی.قایالارین بیر یانی سیلدیریم داغلار وبیر یانی دا درین بیر اوچوروم ایدی و اوچوروم دیبینده قیزیل اوزه ن آخیب گئدیردی.او جیغیر کوبلان کندینه قوووشوردی
اوکندین اینسانلاری قوناق سئور وسئویملییدی.
ائولری قارتال یوالاری کیمی،بیر-بیر،هوندور و قوجامان قایالارئوزرینده.
گئجه لری قیزیل اوزه ن نین مین ایللردن بئری سویله دیگی ناغیل لاریلا گوزلرینی یومور و سحرلری اونون ایشقلانان شیریلتی لاریلا گوزلرینی آچیردی او کند.
کوبلانا ایلک گئدیشیمده آنام آرتیق قوجالمیشدی.ناغیلین یولی هرزامان گئرچه ین یولوندان فرقلی اولمیشدی.
ناغیلین قانادلانان قوشو گئرچک اولمایان دنیالارا قونا بیلمیش سه ،گئرچه ین قوشی یا قفسلرده جان وئرمیشدیر یا دا باغرینا سانجیلان اوخا قوربان گئتمیشدیر.،

آنامین کوبلان ناغیلی گئرچه یین ئوزودو. او زاماندان سونرا کوبلانا هرگئتدیگیمده آنامین ان سئودیگیمناغیلینی دینله مگه دییل،اونو بیر باشا گورمه یه ویاشاماغا کئدیردیم. 
آرتیق من ئوزوم آنامین ناغیل قوشو اولموشدیم.کئرچک اولمایان دنیالارا دییل،کئرچک اولان کوبلان کندینه
اوچوب قونوردوم.هرقونوشومدا دا آنامین ناغیلی بیرداها گئرچکلیک قازانیر ومنه آنامین دیلیندن ائشیدیرمیشم کیمی ذوق وریردی

ع-سلامی

فارس الفباسینا چئویرن:احمد اسماعیلی


کوبلانکوبلان کندی

تاریخ آخرین ویرایش مطلب: تاریخ آخرین ویرایش: ۹۵/۱۲/۲۱ - ۰۷:۵۴
اشتراک گذاری: تلگرام فیسبوک تویتر
برچسب ها: کوبلان کندی 1

1
1


لوگین شوید تا بتوانید نظر درج کنید. اگر ثبت نام نکرده اید. ثبت نام کنید تا بتوانید لوگین شوید و علاوه بر آن شما نیز بتوانید مطالب خودتان را در سایت قرار دهید.
فراموش کردم
تبلیغات